Шүүхийн Эвлэрүүлэн зуучлалын талаар хүнээс л сонсож байсан болохоос биш өөрөө үйлчлүүлнэ чинээ зүүдэлсэнгүй.
2016-05-16 00:00:00 | 125Энэхүү төслийг санаачлагч Шүүхийн ерөнхий зөвлөл болоод Японы олон улсын хамтын ажиллагааны байгууллага /ЖАЙКА/-ын эвлэрүүлэн зуучлах тогтолцоог сайжруулах төсөлтэй хамтран "Эвлэрүүлэн зуучлалын тухай хууль, түүнд нийцүүлэн гаргасан дүрэм журам нь зөвхөн маргааны талаар хязгаарлагдахгүй "НИЙГЭМ”-д ашигтай, үр нөлөөтэй ажиллагаа юм. Энэ нь хүмүүсийн төдийгүй Аж ахуй нэгж, бизнесийн байгууллагын хоорондын мөн түүнчлэн гэр бүлийн амьдралын найрсаг харилцааг сэргээн тогтоож, маргааны шийдлийг аливаа хатуу хэлбэрт баригдалгүйгээр уян хатан хувилбараар сонгох, хэрэг хянан шийдвэрлэх зардлыг хэмнэх, маргалдагч талууд өөрсдөө маргааны шийдлийг олоход оролцох, мөн эдийн засаг, цаг хугацаа хэмнэх гээд маш олон давуу талтай. Шүүх арбитраар явж олон жилийн түншлэл, цаашдын бизнесийн боломжоо алдаж, нөхөрлөл, ажил хэргийн харилцаагаа дуусгавар болгох, нэг нэгэндээ дайсагнахыг хэн бүхэн хүсэхгүй. Нийгмийн харилцаанд найрсаг байдал, хамтын ажиллагаа, эвлэрэл зохицлыг хадгалж үлдэх чухал арга хэрэгслийн нэг бол яах аргагүй "Эвлэрүүлэн зуучлал” юм.
Тиймээс тус шүүхийн эвлэрүүлэн зуучлалаар маргаанаа шийдвэрлүүлсэн нэгэн ахмад буурлын сэтгэгдлийг үлдээхийг хүслээ.
Өмнөговь аймгийн Ханбогд сумын уугуул иргэн Л.Сайнхүү миний бие нь 1955 онд төрсөн. Тус сумын "Жавхлант” багийн иргэн юм. 2015 оны 10 сард нэг нутаг усанд, айл саахалт олон жил байсан тус багийн иргэн Ш.Эрдэнэчимэг гэх хүнээс бууц хороог нь худалдаж авахаар бид аман гэрээ хийж тохиролцоод 1,600,000 төгрөгийг бэлнээр нь Ш.Эрдэнэчимэгт өгсөн юм. Гэтэл хэдэн сарын дараа "бууц хороогоо зарахаа болилоо” гэж наймаа буцаж надад 800,000 төгрөгийг дансаар шилжүүлэн өгсөн. Тухайн үед би үлдэгдэл мөнгөө удаахгүй өгчих байх гэж бодон итгэж байсан. Гэтэл өнөөдрийг хүртэл бидэнд бууц хороогоо ч зараагүй үлдэгдэл мөнгөө ч өгөхгүй биднийг хохироосоор байсан. Тэгээд ч мөнгө гэдэг зүйл чинь хүний амьдралын бас нэг гол хэрэглээ учир надад хэрэг болоод үлдэгдэл мөнгөө авмаар байна, хэзээ өгөх вэ? гэхэд " Мөнгө байхгүй, боломжгүй байна, шүүхдээд ав” гэх зэрэг элдэв янзын доромжилсон өнгө аястай үгээр хэлээд байхаар нь шүүхэд өгөөд яахав эхлээд Эвлэрүүлэн зуучлах хэсэгээр орж үзье гэж бодоод 2016 оны 04 сарын 04-ны өдөр тухайн хэсэгт бууц хороог нь авах юмуу эсвэл үлдэгдэл 800,000 төгрөгөө эргүүлэн авах зорилготойгоор өргөдлөө гаргаж өгсөн. Өргөдөл өгснөөс хойш 15 хоногийн дараа эвлэрүүлэн зуучлагч нь бидэнтэй уулзалт зохион байгуулж Ш.Эрдэнэчимэг бид 2-ыг уулзуулан ярилцуулж, "Би Ш.Эрдэнэчимэгээс 800,000 төгрөгөө буцаан авахаар тохиролцож эвлэрлийн гэрээ байгуулсан. Тухайн гэрээгээр Ш.Эрдэнэчимэг нь 2016 оны 05 сарын 10-ны өдрийн дотор мөнгөө бүрэн төлөх хүсэлтэй байгаагаа хэлж бид маргаангүй болсон. Ийнхүү 2016 оны 05 сарын 09-ны өдөр 800,000 төгрөгөө би бэлнээр нь хүлээн авсан явдалд маш их баяртай байна.
Миний бие нь шүүхийн хаалгаар анх удаа алхаж байгаа бөгөөд маш айдастай бөгөөд итгэх итгэл муутай байсан. Гэтэл бүх зүйл эсрэгээрээ байлаа. Мөн эвлэрүүлэн зуучлал гэж Шүүхийн шинэтгэлийн нэг сайхан үйлчилгээ байдгыг өөрийн биеэр мэдэрлээ. Өмнө нь Шүүхийн Эвлэрүүлэн зуучлалын талаар хүнээс л сонсож байсан бөгөөд яг ямар байгууллага байдгийг мэдэхгүй, мөн өөрөө үйлчлүүлнэ чинээ зүүдэлсэнгүй явжээ. Миний сэтгэгдэл маш өндөр байгаа. Мөн цаашдаа олон мэдэхгүй хүнд үнэн зөвөөр нь мэдээллэх болно.
Түүнчлэн шүүхийн ажилтнуудын зан чанар, харьцаа хандлага, ур чадвар нь хүртэл маш сайхан санагдаж байна. Энэ сайхан үйлчилгээ буюу буянтай үйлийг Монголд нэвтрүүлж, санаачилсан байгууллага, үүнийг дамжуулан иргэддээ төрийн үйлчилгээг түргэн шуурхай, цаг алдалгүй хүргэж байгаа Эвлэрүүлэн зуучлагч ажилтандаа талархаж байна.
Бидний гомдлыг хүлээн авч маш богино хугацаанд явдал чирэгдэлгүй, цаг хугацаа хэмнэн шийдвэрлэж өгсөнд гүнээ талархаж АЖИЛ АМЬДРАЛ НЬ СҮҮН ЦАГААН МӨРТЭЙ БАЙЖ, ТӨРДӨӨ ҮНЭНЧ, ТҮМЭНДЭЭ ТУСТАЙ ЯВААРАЙ... ГЭЖ ХҮСЬЕ БАЯРЛАЛАА.
Хүндэтгэсэн: Л.Сайнхүү
Өмнөговь аймгийн Ханбогд сум